Policia e Kosovës sot ka kryer një bastisje në një lokacion në Prishtinë, ku edhe janë sulmuar nga një person i dyshuar.
Pas raportimeve të djeshme se dje ka pasur të shtëna me armë zjarri, policia ka mbledhur informacionin e nevojshëm dhe sot ka shkuar që të kryente një bastisje në lokacionin e dyshuar, ku personi i dyshuar i ka drejtuar armën e zjarrit në drejtim të zyrtarëve policor, shkruan lajmi.net.
Njëri nga zyrtarët policor në vetëmbrojtje ka përdorur armën ndaj personit të dyshuar më qëllim të neutralizimit të rrezikut për jetën e tij dhe kolegëve të tjerë.
“Njësitet policore në vendin e ngjarjes kanë hasur një arsenal armësh që posedonte personi i dyshuar. Personi i dyshuar është transferuar për trajtim mjekësor, përderisa rasti vazhdon të hetohet edhe më tutje nga autoritetet kompetente”, thuhet në njoftimin e policisë.
Njoftimi i plotë:
Zyrtari policor në vetëmbrojtje detyrohet të përdor armën e zjarrit ndaj të dyshuarit
Prishtinë, 08 maj 2022
Lidhur me raportimet se me datën 07.05.2022, në zonën e përgjegjësisë së stacionit policor veriu në Prishtinë ka pasur të shtëna me armë zjarri, pas informacioneve të mbledhura dhe hetimeve të kryera, bazuar në urdhrin e gjyqtarit të proceduarës paraprake sot më datë 08.05.2022, në lokacionin e dyshuar është kryer një bastisje nga zyrtarët policorë.
Policia gjatë realizimit të detyrave dhe autorizimeve ligjore bazuar në urdhëresën e gjykatës ka ndërmarr veprime në realizim të bastisjes në shtëpinë e të dyshuarit (B.B.).
Me të arritur në lokacion-shtëpinë e banimit të personit të dyshuar policia ka hasur në personin e dyshuar, i cili papritmas ka drejtuar armën në drejtim të zyrtareve policor duke ua rrezikuar jetën e tyre.
Falë shkathtësive dhe veprimeve të shpejta të zyrtarit policor i njëjti në vetëmbrojtje ka përdorur armën ndaj personit të dyshuar me qellim të neutralizimit të rrezikut për jetën e tij dhe kolegeve të tjerë.
Njësitet policore ne vendin e ngjarjes kane hasur një arsenal armësh që posedonte personi i dyshuar.
Personi i dyshuar është transferuar për trajtim mjekësor, përderisa rasti vazhdon të hetohet edhe me tutje nga autoritetet kompetente.