Policia e Kosovës ka dhënë detaje për një mjet shpërthyes në një lokal në Ranillugë në pronë të Z.M. mashkull serb.
Togeri i Policisë së Kosovës në Gjilan, Ismet Hashani ka bërë të ditur për Gazetën Nacionale se hetues nga Stacioni Policor në Ranillugë dhe hetuesit rajonal duke përshirë Krim Teknikën Rajonale dhe Njësia për trajtimin e mjeteve eksplozive janë në teren.
“Me datën 06.08.2023 rreth orës 14:15 Stacioni i Policisë Ranillug ka pranuar informacion se tek lokali i quajtur ,,Kod Maksi” pronë e Z.M. (mashkull, kosovar serb) dyshohej se ka shpërthyer një mjet shpërthyes. Rasti dyshohet të këtë ndodhur më datë: 05.08.2023 rreth orës 22:45. Njësitet policore relevante patrulluese, hetues nga Stacioni Policor Ranillugë, hetues rajonal duke përfshirë Krim Teknikën Rajonale dhe Njësia për trajtimin e mjeteve eksplozive i janë përgjigjur rastit.” – ka bërë të ditur Hashani.
Tutje ai ka bërë të ditur se nuk kanë arritur që të bisedojnë me pronarin e lokalit, pasi që i njëjti ndodhet në pushime jashtë Kosovës.
“Nga vendi i ngjarjes është raportuar se nga ky rast lëndime trupore nuk ka pësuar askush përpos disa dëmeve të vogla materiale. Pronari i lokalit nuk është takuar nga policia pasi i njëjti për momentin gjendet në pushime jashtë Republikës së Kosovës. Rrethanat se si ka ndodhur rasti vazhdojnë të hetohen nga Hetues Rajonal të Policisë në koordinim të plotë me Prokurorinë e Shtetit. ” – ka bërë të ditur Hashani.
Gazeta Nacionale më parë ka raportuar se mjeti shpërthyes ka ndodhur në lokalin në afërsi të shtëpisë së deputetit të Listës Serbe, Zoran Maksimoviq në Ranillugë.
Maksimoviq ka dhënë një prononcim rreth kësaj ngjarje për portalin Kosova Online, ku ka thënë se mjeti shpërthyes i dorës është hedhur në kopshtin e lokalit, i cili në atë kohë ishte i mbyllur.
“Ishim me pushime, vetëm vajza ishte në shtëpi. Të gjithë e dëgjuan shpërthimin, por nuk e dinin se çfarë ishte dhe askush nuk e pa se kush e bëri atë. Fatmirësisht ka pasur vetëm dëme të vogla materiale. Rasti është raportuar në polici, kanë bërë hetime, ka pasur policë nga Gjilani dhe Prishtina. Hetimi janë në vazhdim dhe nuk mund të them asgjë më shumë.” – është shprehur deputeti Maksimoviq.
Rreth rastit kanë reaguar edhe nga Lista Serbe duke dënuar ashpër këtë sulm dhe duke kërkuar që drejtësia të jetë përgjegjëse për këtë akt.
“Është e nevojshme që urgjentisht të konstatohen të gjitha faktet dhe rrethanat e këtij sulmi, sepse është e papranueshme që pa arsye të sulmohen qytetarët, e sidomos përfaqësuesit e popullit serb. Nuk duam të paragjykojmë rrjedhën e hetimeve, por seria e sulmeve ndaj serbëve në jug të Kosovës janë pasojë e retorikës së regjimit në Prishtinë dhe mosndëshkimit të javëve të kaluara.” – thuhet në njoftimin e Listës Serbe
