Policia e Kosovës ka sekuestruar 4700 euro të falsifikuara, të gjitha kartmonedha nga 100 euro.
E dyshuara është arrestuar dhe me urdhër të prokurorit është dërguar në mbajtje. Ajo është e dyshuar se ka tentuar të bëjë shpërndarjen e këtyre parave të falsifikuara.
Komunikata e plotë:
’Falsifikim i parasë: Falë bashkëpunimit me qytetarë, hetuesit policorë nga Njësiti Rajonal për Hetimin e Krimeve Ekonomike dhe Korrupsionit–Prishtinë, në bashkëpunim me Prokurorinë Themelore-Prishtinë, më 06.04.2023, kanë arritur të sigurojnë informata dhe prova se e dyshuara N.B., (viti i lindjes 1987, femër kosovare), ka tentuar të bëjë shpërndarjen e një sasie të parave të falsifikuara.
Tek e dyshuara, në çantën e saj janë gjetur: 47 kartëmonedha nga 100 € (gjithsejtë 4,700.00€), të cilat dyshohet se janë të falsifikuara si dhe një elektroshok.
Ndaj të dyshuarës është iniciuar rasti ‘falsifikimi i parasë’. Ajo është intervistuar dhe me
aktvendim nga prokurori e njëjta është dërguar në mbajtje deri në 48 orë.
