Policia e Kosovës ka arrestuar të enjten avokatin Besnik Berisha dhe gjashtë të tjerë nën dyshimin për tri vepra penale. Në aksionin e Krimeve të Rënda të Policisë së Kosovës në disa lokacione, janë konfiskuar 7 mijë e 500 euro para të gatshme, tha sot policia në raportin 24-orësh, raporton Gazeta Papirus.
“Drejtoria e Hetimeve të Krimeve të Rënda me autorizim të Prokurorit ka bastisur disa lokacione dhe ka arrestuar shtatë (7) të dyshuar meshkuj kosovarë, nën dyshimin se të njëjtit kanë ndikuar dhe penguar hetimet në lidhje me një rast të fajdeve”, thuhet në raportin e policisë.
“Në cilësi të provave materiale janë konfiskuar: një pistoletë, 5 telefona dhe 7500 € para të gatshme”.
Pas intervistimit, me vendim të prokurorit të dyshuarit janë dërguar në mbajtje.
Prokuroria Themelore e Ferizajt, e cila e udhëhoqi aksionin, ka njoftuar të enjten se ata dyshohen për veprat penale “Dhënia e ndihmës kryesve pas kryerjes së veprave penale”, “Pengimi i të provuarit apo procedurës zyrtare” dhe “Ushtrim i ndikimit”.
