62-vjeçari Naser Gashi ka vdekur si pasojë e plagëve të marra nga dy persona të maskuar, derisa ishte bashkë me Miftar Miftarin, 40-vjeç, i cili është i plagosur, më 25 mars në rrugët “Bajram Kelmendi” dhe “Rrustem Hyseni”, në Prishtinë.
Zëdhënësja e Prokurorisë Themelore në Prishtinë, Kaltrina Shala, të enjten për Klankosova.tv ka deklaruar se për rastin në fjalë nuk ka të arrestuar, derisa ka thënë se ende nuk dihen motivet e sulmit.
Në raportin 24-orësh të policisë thuhet se kishin siguruar informacione se armët e përdorura në rastin në fjalë janë gjetur të fshehura në magjistralen Prishtinë – Mutivodë.
Njësitet e policisë dolën në vendin e ngjarjes dhe kanë bërë sekuestrimin e tri armëve të zjarrit: një armë zjarri AK 47, një armë zjarri e tipit TT dhe një armë zjarri COLT.
Policia e Kosovës po vazhdon të punojë intensivisht në hetimin dhe ndriçimin e plotë të rastit, si dhe sjelljen para organeve të drejtësisë së personave të dyshuar.
