Shkëmbimi i zjarrit në mes të Policisë dhe grupit të armatosur deri në “fyt” mëngjesin e sotëm në veri të vendit, dyshohet se ka rezultuar edhe me të plagosur nga ana e sulmuesve.
E për shkak të situatës të tensionuar, Policia e Kosovës ka rritur gatishmërinë pas zhvillimeve të fundit në veri duke kaluar në orar 12 orësh, kështu bëjnë të ditur burimet e Sinjalit.
Të njëjta burime shtojnë se pelegrinët I janë nënshtruar një kontrolle nga Policia për gjurmë të parafinës.
Ndryshe, drejtoresha e Spitalit Rajonal të Mitrovicës, ka konfirmuar se një nga terroristët e plagosur është pranuar në spital.
“Ka ardhë me lëndime me armë zjarri në këmbë. Është udhëzuar për në QKUK për trajtim të mëtejshëm. Ai ka ardh me parametra stabil dhe ashtu është nisur për në Prishtinë”.
Zhubi shtoi se terroristi rreth 46-vjeçar është i “lënduar në pjesën e këmbës dhe në anën tjetër ka një thyerje të hapur”.
Ajo shtoi se i plagosuri “është pjesëtar i forcave paramilitare serbe”, ndër të tjerash, Zhubi shtoi se në spital kanë pranuar një polic të Kosovës i cili ka lëndime të lehta.
Kujtojmë se sot në orët e hershme të mëngjesit, një grup i organizuar dhe i armatosur ka hapur zjarr ndaj pjesëtarëve të Policisë së Kosovës, ku si pasojë një polic ka humbur jetën dhe dy të tjerë kanë mbetur të lënduar.
