Pas shkatërrimit të një plantacioni të kanabisit në Pejë vitin e kaluar, vlera e të cilit kapte shifrën e 5 milionë eurove, Policia e Kosovës është në kërkim të dy shtetasve shqiptarë të dyshuar për përfshirje në këtë aktivitet kriminal.
Në nëntorin e vitit 2024, me urdhër të Prokurorisë Themelore në Pejë, autoritetet kanë shkatërruar plantacionin e kanabisit dhe kanë lëshuar urdhër-arrest për 9 persona, transmeton Gazeta Papirus.
Tani, Policia ka njoftuar se është në kërkim edhe të dy shtetasve shqiptarë, Klodian Qokli dhe Shkëlqim Xhiaj, siç mëson Insajderi, si të dyshuar për rastin e plantacionit të kanabisit me vlerë 5 milionë euro.
Ky aksion kishte qenë pjesë e hetimeve për një grup të dyshuarish të akuzuar për kultivimin dhe shpërndarjen e kanabisit.
Grupi dyshohej për kryerjen e veprave penale “Kultivimi i bimës së hashashit, shkurres së kokainës ose bimëve të kanabisit” si dhe “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Policia kishte arritur të sekuestrojë telefonin e një prej të arrestuarve, i cili pritej të ekzaminohej për detaje të mëtejshme të aktivitetit kriminal.
Deri atëherë, një shtetas shqiptar, Aleks Gërbi, ishte arrestuar, ndërsa nëntë të tjerë ishin në arrati.
Hetimet për grupin vazhdonin.
Për të dyshuarin pritej që Prokuroria të kërkonte ekstradimin e tij në Kosovë.
Ky aksion kishte qenë nën udhëheqjen e Prokurorit Ersan Qavolli dhe vazhdonte të ishte pjesë e një hetimi më të gjerë lidhur me trafikun e narkotikëve.
