Gazeta Sinjali raportoi sot për një rast të vjedhjes që ka ndodhur mbrëmë në spitalin ‘Royal Medical’ në rrugën Prishtinë – Ferizaj, ku katër hajna të maskuar kanë depërtuar brenda me forcë. Njëri me sëpatë e të tjerët me mjete të tjera arritën t’i vidhnin disa zarfe që janë të parapara për të holla dhe më pas kanë ikur me një veturë.
Rastin e ka denoncuar në Polici menaxheri i logjistikës, i cili e ka konfirmuar edhe për Gazetën Sinjali atë që ka ndodhur mbrëmë në spital.
Ai ka bërë të ditur se e ka raportuar menjëherë rastin dhe se fatmirësisht zarfet që kanë vjedhur hajnat nuk ishin të mbushur me para.
“Mbrëmë ka ndodhur rasti në 21:35 edhe ka zgjatë shumë shkurt. E kanë shfrytëzuar hyrjen anësore, pro janë vërejtur nga roja. Ata kanë qenë katër persona, me një veturë të tipit Golf. Zarfet e parave i kanë marrë, por kanë qenë të thatë. Ndoshta kanë mëndu që kanë para edhe kanë ikë. Por mungesë të parave nuk kemi vërejtur. As CD-të e pacientëve dhe dokumente të tjera nuk janë prekur.“, tha ai për Sinjalin.
Sinjali raportoi pak më parë se me t’u denoncuar rasti, njësitet përkatëse kanë dalë në vendin e ngjarjes, për t’i bërë ekzaminimet e nevojshme, ndërsa me urdhër të Prokurorit të Shtetit rasti është iniciuar si “Vjedhje e rëndë”.
