Mesditën e djeshme komuna e Fushë Kosovës dhe i gjithë vendi u trondit nga një ngjarje e rëndë që ngjau në rrugën ‘Besa Besë’. Sabit Islami, 69-vjeçar, u doli në pritë dy grave, nënë e bijë, dhe në drejtim të tyre shtiu disa herë me armë zjarri dhe dyshohet se tentoi që t’i privojë nga jeta. 64-vjeçarja F.G., dhe e bija 44-vjeçare M.A., kanë mbetur të plagosura dhe u dërguan me urgjencë në spital, ndërsa Islami u largua me shpejtësi me veturën e tij për në drejtim të panjohur, për t’u gjetur më vonë nga Policia. Islami në rrethana ende të paqarta, dyshohet të jetë vetplagosur gjatë tentativës për të ikur nga duart e Policisë.
Epilogu i gjithë ngjarjes së djeshme, ishte tragjik për Sabit Islamin nga fshati Nakaradë i Fushë Kosovës. Ai vdiq në Emergjencën e Qendrës Klinike Universitare të Kosovës, ku u dërgua në gjendje të rëndë si pasojë e plagëve të shkaktuara nga arma e zjarrit.
Por si dyshohet që mori ai ato plagë?
Pas disa orësh kërkime, Policia kishte marrë informacione se i dyshuari për plagosjen e dyfishtë në Fushë Kosovë, është parë në rrugën ‘Fehmi Lladrovci’.
Sinjali mëson se pasi njësitë policore shkuan në atë lokacion, kanë hasur në të dyshuarin i cili ishte duke ecur në këmbë. Të njëjtit i është bërë thirrje që të dorëzohet, mirëpo Islami nuk ka pranuar që t’u bindet organeve të rendit.
Aty dyshohet të ketë filluar drama, kur 69-vjeçari kishte nxjerrë armën dhe dyshohet të ketë shtënë në drejtim të policëve që ishin vënë në ndjekje të tij.
Sipas deklaratës së Policisë, për të evituar sulmin e drejtpërdrejtë dhe rrezikun që u kanosej atyre dhe qytetarëve përreth, kanë ndërmarrë të gjitha veprimet policore në përputhje me autorizimet e tyre.
Sinjali mëson se pas të shtënës që është shkrepur nga njëri prej zyrtarëve policorë që po merrte pjesë në operacionin për arrestimin e të dyshuarit, Islami dyshohet të ketë rënë në një gropë ku më pas janë dëgjuar disa të shtëna nga arma e tij, të cilat mund t’ia kenë shkaktuar edhe plagët në trup.
I dyshuari i cili kishte shenja jete, është transferuar me urgjencë në Emergjencën e QKUK-së, ku pavarësisht intervenimit të stafit mjekësor, i njëjti s’ka arritur që t’i përballojë plagët e marra dhe si pasojë ka ndërruar jetë.
Vdekjen e tij e ka konfirmuar mjeku kujdestar i Emergjencës, Ejup Govori.
“Gjendja e tij kur është pranuar në QKUK ka qenë e rëndë, pra ka pasur shenja jete por ka qenë me parametra vital të komprometuar. Ka pasur dy plagë nga arma e zjarrit”, ka thënë Govori.
Ndërkohë lidhur me rastin janë deklaruar edhe nga Policia e Kosovës.
Zëdhënësja e Policisë së Kosovës për rajonin e Prishtinës, Florie Ahmeti, tha për Sinjalin se ka baza të forta dyshimi se ai është vetëplagosur.
“Ndërkaq që sulmi ndaj policisë është neutralizuar i dyshuari në përpjekje e sipër për t’iu shmangur arrestit policor, në rrethana që aktualisht po trajtohen ka marrë plagë nga shkrepja e armës së zjarrit. Aktualisht përkundër që ka baza të forta dyshimi për vetëplagosje, policia bashkërisht me autoritetet e tjera relevante ligj zbatuese po heton me përpikëri të gjitha rrethanat që karakterizojnë rastin”, tha Ahmeti.
Gjendja shëndetësore e dy viktimave, nënë e bijë
Burimet e Gazetës Sinjali brenda Emergjencës kanë bërë me dije se 44-vjeçarja ka marrë plagë në të dy duart, ndërsa 63-vjeçarja është dërguar atje në gjendje të rëndë për shkak të plagëve që kishte marrë në bark dhe këmbë.
Pas intervenimit të stafit mjekësor, gjendja e viktimës M.A., është stabilizuar dhe është jashtë rrezikut për jetë, ndërsa për shkak të gjendjes më serioze, 64-vjeçarja i është nënshtruar një intervenimi kirurgjik.
