Tonino Picula, raportuesi i Parlamentit Evropian për Serbinë, ka deklaruar se një vend kandidat për anëtarësim në Bashkimin Evropian, siç është Serbia, nuk mund të ketë të burgosur politikë, duke e cilësuar këtë si një zhvillim alarmues për një shtet që shpreh ambicie evropiane.
“Fakti që një vend kandidat mund të ketë të burgosur politikë, sigurisht që nuk është pozitiv për një shtet që synon integrimin në BE”, u shpreh Picula për Deutsche Welle, pas një takimi në Bruksel me studentët ultramaratonistë nga Serbia.
Ai i referohet rastit të gjashtë aktivistëve dhe studentëve të cilët gjenden në paraburgim tashmë prej 60 ditësh. Ata janë akuzuar për përpjekje për rrëzim të rendit kushtetues.
Ndaj gjashtë aktivistëve të tjerë të lëvizjes STAV, të cilët në momentin e arrestimeve ndodheshin jashtë vendit, është ngritur po e njëjta akuzë. Ata aktualisht ndodhen ende në mërgim.
Sipas mbrojtësve të të arrestuarve, prova kryesore ndaj tyre është një audio-incizim i një bisede të përgjuar nga Agjencia për Siguri dhe Informim (BIA). Ky incizim është transmetuar më 14 mars në televizione të afërta me pushtetin, ndërsa arrestimet kanë ndodhur menjëherë pas publikimit të tij.
Avokatët mbrojtës thonë se përgjimi është kryer në mënyrë të jashtëligjshme dhe se materiali audio nuk mund të pranohet si provë ligjore në procesin penal.
Ky rast ka ngjallur shqetësim të madh në qarqet evropiane dhe mund të ndikojë në raportet mes BE-së dhe Serbisë, në një moment delikat për aspiratat integruese të Beogradit.
