Pesë skiatorë janë gjetur të vdekur pranë malit Rimpfischhorn në Zvicër të dielën, pas një operacioni kërkim-shpëtimi që nisi një ditë më parë, njoftoi zyra e prokurorit të Kantonit Valais, transmeton Gazeta Papirus.
Trupat e pajetë u zbuluan në afërsi të akullnajës Adlergletscher, në një lartësi prej rreth 4,000 metrash, pasi u raportuan ski të braktisura në zonë. Kërkimet përfshinë ekipe tokësore dhe helikopterë në rajonin jugperëndimor të Zvicrës, pranë kufirit me Italinë veriore, raporton agjencia Reuters.
Identiteti i viktimave ende nuk është konfirmuar dhe autoritetet kanë nisur hetimet për të zbardhur rrethanat e ngjarjes.
Rimpfischhorn, me një lartësi prej 4,199 metrash, ndodhet në lindje të Zermatt dhe është një destinacion i njohur për skiatorët dhe alpinistët.
