Rastet e dhunës në familje në vendin tonë veçse po shtohen dhe kjo situatë po bëhet çdo ditë e më e rrezikshme. Konfirmohet se vetëm dje, kanë ndodhur disa raste për të cilat është nevojitur ndërhyrja e Policisë.
Siç konfirmon Policia, dy raste të dhunës kanë ndodhur në qytetin e Prizrenit , me ç’rast vëllai ka ushtruar dhunë ndaj motrës së tij duke i shkaktuar edhe lëndime trupore, shkruan Gazeta Papirus.
Pavarësisht dhunës, viktima nuk ka pranuar tretman mjekësor, ndërsa i dyshuari është dërguar në mbajtje.
Krahas kësaj, ngjarja tjetër është edhe më e dhimbshme bazuar në faktin se një person për motive të panjohura ka ushtruar dhunë ndaj gjyshes së tij, i njëjti është dërguar në mbajtje.
Ndërkaq, mbrëmë rreth orës 19:00 konfirmohet se babai e ka sulmuar fizikisht vajzën e tij, të dyshuarit i është konfiskuar edhe një pistoletë. Po të njëjtën ditë, bëhet e ditur se rreth orës 23:00 burri e ka rrahur bashkëshortën e tij, e njëjta është detyruar ta lajmërojë Policinë pas lëndimeve të rënda, megjithatë ka refuzuar tretmanin mjekësor.
Në Graçanicë, një person ka ushtruar dhunë fizike ndaj të dashurës së tij me të cilën ishte duke bashkëjetuar të njëjtës i është nevojitur tretman mjekësor. Me të lajmëruar Policinë, viktima është kthyer te familja e saj.
Theksojmë se tre të dyshuarit që kanë ushtruar dhunë, me vendim të Prokurorit të Shtetit janë dërguar në mbajtje.
/Gazeta Papirus/
