Deputetët e Kosovës edhe sot do të bëjnë përpjekjen e radhës për konstituimin e Kuvendit.
Kjo do të jetë hera e 13-të për ta.
Lëvizja Vetëvendosje ka propozuar Albulena Haxhiun për kryetare të Kuvendit, gjersa partitë tjera, PDK, LDK e AAK, nuk po e përkrahin, duke thënë se nuk është person unifikues.
Kryetari i LVV-së, Albin Kurti i ka dërguar një letër kryetarit të Lidhjes Demokratike të Kosovës, Lumir Abdixhiku, përmes së cilës i ka ftuar në koalicion qeverisës.
Pas kësaj letre, u mblodh kryesia e LDK-së, gjersa kryetari i kësaj partie ka mbajtur edhe një konferencë për media.
Abdixhiku në këtë konferencë ka propozuar një qeveri tranzicionale, duke refuzuar kështu koalicion qeverisës vetëm me LVV.
“Kam marrë një letër nga kryetari i VV-së dhe i nxitur nga konsiderata për votuesit e VV-së, kam ndjerë nevojën që t’i përsëris qëndrimet dhe bindjet tona mbi çështjet qe janë ngritur mbi atë. LDK-ja duke parë stagnimin 4-vjeçar, e kam fjalën për aleancat e rrezikuara, rrezikimin e sigurisë nacionale…
E kam vlerësuar të pamundur bashkëpunimin me z.Kurti. Por, sot vendi është në krizë të thellë institucionale, pikërisht për shkak të partisë së parë. Dhe zgjidhjen nga kjo bllokadë LDK-ja e konsideron të domosdoshme. Propozojmë nisjen e një procesi të ri politik. Në përputhshmëri me këtë LDK-ja propozon nisjen e këtij procesi me të gjitha partitë për nisjen e një qeverie nacionale te tranzicionit”, ka deklaruar ai.
Abdixhiku ka ftuar të gjitha partitë që të bëhen bashkë dhe të ofrojnë zgjidhje.
“Një qeveri me afat të caktuar, deri në zgjedhjen e presidentit të ri”, theksoi Abdixhiku.
Megjithatë, PDK dhe AAK e refuzuan me mirësjellje këtë propozim të Abdixhikut, pasi të njëjtit nuk duan të jenë të ulur në një takim me Kurtin e VV’së.
Kësisoj, PDK propozoi që Presidentja e vendit, Vjosa Osmani t’i ftoj partitë politike për takim në mënyrë që të hapen rrugët e tjera për zhbllokimin e Kuvendit.
Presidentja Osmani ka shprehur gatishmërinë që t’i presë në takim liderët e partive politike.
Bekim Kupina, këshilltari për media i presidentes, ka njoftuar se Vjosa Osmani tashmë ka shprehur gatishmërinë e plotë që nga data 16 prill 2025 që t’i presë liderët e partive politike në rast se ata e shohin të nevojshme një gjë të tillë.
“Presidentja e Republikës së Kosovës, Vjosa Osmani, tashmë ka shprehë gatishmërinë e plotë, që nga data 16 prill, që t’i presë liderët e partive politike në rast se ata e shohin të nevojshme një gjë të tillë. Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”- ka thënë Kupina.
