Objektet e Komunës së Prishtinës do të zbukurohen me perde të reja. Kjo është bërë e ditur përmes njoftimit për dhënie të kontratës. Ky “ndryshim” do t`i kushtoj buxhetit të kryeqytetit rreth 30 mijë euro.
Komuna e Prishtinës, që drejtohet nga Përparim Rama i LDK-së ka bërë një investim për pamjen e brendshme të objekteve.
Ka shpallur tenderin për furnizim me perde. Sipas njoftimit që është publikuar në faqen e Komisionit Rregullativ të Prokurimit, ky investim do t`i kushtoj buxhetit të kryeqytetit rreth 30 mijë euro, shkruan Gazeta Insajderi.
Sipas kontratës që është bërë publike, kompania që do t`ia dërgoj perdet komunës së Prishtinës është zgjedhur biznesi ‘N.P.P Rolle Mont”.
Ky institucion nuk ka dhënë detaje të tjera rreth kësaj blerje, në përshkrimin e kontratës. Tenderi është dhënë me procedurë të hapur por nuk është treguar se sa kompani kanë qenë pjesëmarrëse.
Shpenzimi i buxhetit të Komunës së Prishtinës për dreka e darka
Mbi 11 mijë euro të taksave të qytetarëve janë shpenzuar nga pushteti i ri në Komunën e Prishtinës, për dreka zyrtare e akomodim.
Lista e siguruar nga Gazeta Insajderi, nxjerr në pah se figurojnë faturat e 9 drekave zyrtare, ndërsa për vetëm dy prej tyre janë harxhuar mbi 5 mijë euro
Një organizim i zyrtarëve të Ramës, në një hotel në Pejë është paguar në shumën prej 3 mijë euro. Organizimi është mbajtur me 23 shkurt të këtij viti.
Ndërsa mbi 5 mijë euro janë paguar vetëm për dy dreka më të mëdha të organizuar nga Komuna e Prishtinës. Ky institucion nuk ka dhënë detaje se çfarë darkash kanë qenë, për kënd janë organizuar dhe sa persona kanë qenë të pranishëm, por vetëm se faturat e drekave janë të muajit maj dhe korrik.
Dreka e parë zyrtare që është mbajtur me 6 maj, del se është paguar nga zyra e financave të kryeqytetit në shumën prej 2 mijë e 100 eurove. Derisa dreka tjetër zyrtare që është mbajtur me 7 korrik, ka kushtuar mbi 3 mijë e 393 euro, shkruan Insajderi.
Kjo nuk është e tëra për këtë kategori shpenzimesh të komunës që drejtohet nga Përparim Rama.
Në listë figurojnë të paktën edhe gjashtë dreka tjera zyrtare. Tri prej të cilave kanë kushtuar 539 euro, e që figurojnë të muajit korrik.
Ndërsa fatura e tri drekave tjera të muajit gusht janë në shumën e 753 eurove. /GAZETAPAPIRUS/
