Përleshjet e rrahjet nëpër rrugë e lokale tashmë janë bërë të zakonshme në vendin tonë. Pothuajse çdo ditë raportohet për sherre të ndryshme, motivet e të cilave shpesh dalin të jenë banale. Në shumë prej tyre përpos grushteve, përdoren edhe mjete të forta e të mprehta, duke u rrezikuar kështu direkt jeta e personave të përfshirë, raporton Gazeta Sinjali.
Një rast i rëndë ka ndodhur mbrëmë në rrugën “Adem Voca” në Mitrovicë, ku disa persona janë përfshirë në një rrahje brutale dhe për pasojë një 50-vjeçar ka mbetur i plagosur rëndë nga mjetet e forta.
Burimet e Gazetës Sinjali brenda Emergjencës së Qendrës Kryesore së Mjekësisë Familjare në Mitrovicë kanë bërë me dije se viktimës i është ofruar ndihma e parë mjekësore, por për shkak të gjendjes së rëndë është transferuar në Qendrën Klinike Universitare të Kosovës për trajtim të mëtutjeshëm.
Lidhur me rastin është njoftuar edhe Policia e Kosovës të cilët kanë dalë në vendin e ngjarjes dhe kanë marrë dëshminë e viktimës, i cili ka dhënë detaje për rastin.
Me urdhër të prokurorit, rasti është cilësuar ‘Lëndim i rëndë trupor”, ndërsa veprimet tjera ligjore do merren posa të kapen të dyshuarit.
