Përleshjet mes të rinjve në lokale të ndryshme në qytetet e Kosovës, janë bërë të shpeshta. Këto raste jo rrallëherë eskalojnë në sulme brutale. Kështu ka ndodhur të dielën te Hib Petrol, në rrugën e ‘Reçakut’ në Ferizaj, ku ka ndodhur një rrahje, motivi i së cilës dyshohet të jetë një mosmarrëveshje e momentit. Tre persona janë përfshirë në këtë rast, të cilët janë arrestuar, raporton Gazeta Sinjali.
Burimet nga Prokuroria kanë bërë me dije se bëhet fjalë për Arsim Potera, Ilir Istrefi dhe Kujtim Spahia, të cilët tashmë ndodhen nën masën e ndalimit policor.
Sinjali mëson se të dyshuarit janë përleshur, duke e goditur njëri-tjetrin dhe për pasojë kanë marrë lëndime trupore, për çka janë dërguar për trajtim mjekësor.
Pasi Policia ka marrë informacionin për rastin ka dalë në vendin e ngjarjes, ku janë arrestuar personat e dyshuar, të cilët janë shoqëruar në stacion policor për intervistim. Përveç tyre janë shoqëruar edhe dy shtetase të Shqipërisë, por që kanë dhënë deklarata për rastin në cilësinë e dëshmitarëve.
Pas përfundimit të procedurave policore, Prokurori i Shtetit ka urdhëruar ndalimin prej 48 orësh ndaj tre të dyshuarve dhe dorëzimin e kallëzimit penal.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
