Një vilë në Bogë të Rugovës së Pejës është përfshirë nga zjarri mbrëmë rreth orës 21:00, me ç’rast janë shkaktuar dëme të mëdha materiale, raporton Gazeta Sinjali.
Sinjali mëson se zjarri dyshohet se ka filluar nga oxhaku i vilës e më pas e ka përfshirë atë në tërësi dhe si pasojë janë shkaktuar dëme rreth 100 mijë euro.
Burimet e Sinjalit bëjnë me dije se në vendin e ngjarjes kanë dalë njësitë policore bashkë me zjarrfikësit të cilët kanë arritur që pas shumë përpjekjeve të bëjnë shuarjen e tërësishme të zjarrit.
Sipas dëshmitarit të rastit i cili ndodhej në vilë momentin që shpërthyen flakët, ai kishte ndezur stufën e cila ndodhej brenda objektit e më pas kishte vërejtur tymin dhe zjarrin që kishte kapluar vilën.
Njësitë policore kanë kryer ekzaminimet e nevojshme që ndihmojnë në zbardhjen e rrethanave të rastit, ndërsa me urdhër të prokurorit rasti është iniciuar ‘Zjarrvënie’.
