Varësia nga droga në Kosovë sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike. Ato po përdoren me të madhe, sidomos nga të rinjtë të cilët shpesh kapen në flagrancë nga Policia, raporton Gazeta Sinjali.
Një rast i tillë është zbuluar edhe mbrëmë në rrugën “Ahmet Krasniqi” në Prishtinë, teksa Policia po patrullonte në një pikë kontrolli, ku ka ndalur një veturë, nën dyshimet për gjësende të kundërligjshme.
Gjatë kontrollimit të veturës dhe të të dyshuarit 23-vjeçar Y.K., zyrtarët policorë kanë gjetur dhe sekuestruar nga i riu një sasi të substancës narkotike, të llojit marihuanë.
Për shkak të posedimit të drogës, i riu është arrestuar në flagrancë dhe është shoqëruar në stacion policor, ku është intervistuar nga hetuesit për veprën për të cilën ngarkohet.
Burimet e Sinjalit kanë bërë të ditur se Prokurori i Shtetit ka urdhëruar inicimin e rastit ndaj tij dhe dorëzimin e kallëzimit penal brenda afatit ligjor.
