Pep Guardiola thotë se Manchester City e ka dëshmuar se mund të fitojë kur nuk fitorja është mundësia e vetme, pasi e mundi Arsenalin për ta futur në dorë garën për titull në Premierligë.
Skuadra e Guardiolës e mposhti liderin Arsenal 4:1 në Etihad Stadium dhe tani është vetëm dy pikë mbrapa me dy ndeshje më pak të zhvilluara.
Cityt i kanë mbetur edhe shtatë ndeshje, duke nisur nga ajo në udhëtim kundër Fulhamit të dielën, pastaj në shtëpi kundër West Hamit dhe Leeds Unitedit.
“Ne nuk mund ta humbim përqendrimin. Tani është në duart tona”, tha Guardiola pas ndeshjes.
“Tri ndeshjet e radhës do të përcaktojnë nëse mund të bëjmë atë që duam ta bëjmë. Realiteti është se ne ende jemi mbrapa Arsenalit. Nuk është e lehtë për ne. Kur është në duart tona, duhet ta shfrytëzojmë”, nënvizoi ai.
City është në rrugë të mirë për ta fituar tripletën, Premierligën, Ligën e Kampionëve dhe FA Cup, dhe Guardiola thotë se përvoja e lojtarëve të tij që e dinë e çfarë nevojitet për të fituar në fazën finale të sezonit po del të jetë vendimtare.
“Lojtarët e dinë se është e nevojshme të thonë se gara është e ngushtë dhe ne duhet të fitojmë për të mbetur në garë”, nënvizoi ish-trajneri i Barcelonës dhe Bayern Munich.
“Mendësia ku nuk ke opsion tjetër pos fitores është mendësia më e mirë për të luajtur. Lojtarët e kanë dëshmuar se futen në çdo ndeshje për të fituar”.
