Me një ceremoni të veçantë, sot është pensionuar nga Forca e Sigurisë së Kosovës Gjenerali Hysen Dreshaj – i njohur ndryshe si “Besniku i UÇK-së”, një nga figurat më të shquara të luftës dhe pasluftës në Kosovë.
Në ceremoninë e organizuar me këtë rast morën pjesë përfaqësues të lartë ushtarakë dhe bashkëluftëtarë, përfshirë edhe komandantin Daut Haradinaj, i cili përmes një video-mesazhi në rrjete sociale uroi atë për pensionimin.
Një mesazh i veçantë dhe emocional erdhi edhe nga djali i Gjeneralit, i cili ndau ndjenja krenarie për trashëgiminë që lë pas i ati.
“Hyseni mbetet një figurë me peshë në trungun e familjes sonë – njeriu që me dinjitet ka ruajtur dhe përcjellë tek ne vlerat e brezave, duke ndjekur në çdo hap gjurmët dhe mësimet e babait të tij, i cili i kultivoi ndershmërinë, guximin dhe mbi të gjitha, dashurinë për atdheun. Ai sot pensionohet formalisht nga Forca e Sigurisë së Kosovës, por jo nga shërbimi për vendin, sepse kontributi i tij nuk ka pasur kurrë orar, e për të nuk do të ketë kurrë fund.”, shkroi djali i tij.
Edhe bashkëluftëtari Elmi Shala kujtoi me mall dhe respekt shokun e tij të armës.
“Gjeneral Hysen Dreshaj – Besniku ishte një bashkëluftëtar i rrallë, me zemër të madhe, guximtar i palëkundur dhe njeri me vlera të mëdha që gjithmonë ishte aty ku e kërkonte nevoja për atdhe. Pas luftës, punuam bashkë ku tregoi profesionalizëm dhe përkushtim të madh në strukturimin e TMK-së. Kontributi i tij ka lënë gjurmë të pashlyeshme.”, shkroi ai.
