“Brigada e Veriut”, që të enjten u shpall organizatë terroriste nga Qeveria e Kosovës, në një mesazh në Telegram të premten ka thënë se nuk synon “të shkojë nga Kosova”.
Qeveria e Kosovës të enjten i ka shpallur organizata terroriste dy formacionet ilegale serbe – “Mbrojtja Civile” dhe “Brigada e Veriut” – të cilat veprojnë në veriun e Kosovës të banuar kryesisht me serbë.
Kryeministri Albin Kurti ka thënë se të dy organizatat paraqesin kërcënim serioz për sigurinë dhe rendin kushtetues të vendit. Në ditën e vendimit, nga “Brigada e Veriut” kanë thënë se masa nuk do t’i ndalojë që të luftojnë “për Serbinë dhe unitetin”, porse për arsye të sigurisë më nuk do të njoftojnë publikisht për lëvizjet e tyre.
I njëjti mesazh është përcjellë edhe të premten. Aty ndjekësve të kanalit u bëhet e ditur se kanali s’do ta mbajë më emrin që ka pasur e as nuk do t’i përcjellë raportimet e “anëtarëve të organizatës”.
“Kanali do të vazhdojë punën sikurse deri më tani, dhe tema kryesore do të jetë situata dhe ngjarjet në Kosovë dhe punën e marrin përsipër njerëz të tjerë e do të përdoret emër tjetër. Sa i përket nesh, nuk do të shkojmë askund. Kosova është tokë e shenjtë serbe”.
“S’ka kthim prapa” e “Rroftë Serbia” janë mesazhet tjera të këtij grupi.
Të enjten, Qeveria tha se dy organizatat kanë kryer veprime “me elemente terroriste”, si sulme të armatosura ndaj pjesëtarëve të Policisë së Kosovës, pjesëtarëve të Misionit të EULEX-it e ushtarëve të KFOR-it. Kurti ka thënë po ashtu se këto formacione kanë thirrur për rezistencë e mosbindje dhe kanë detyruar qytetarët të marrin pjesë në protesta e barrikada, si dhe kanë “rekrutuar dhe trajnuar pjesëtarë për përdorimin e armëve dhe metodave luftarake në baza ushtarake në Serbi, me qëllim të kryerjes së sulmeve ndaj institucioneve vendore dhe misioneve ndërkombëtare në Kosovë”.
