Ka përfunduar takimi mes KFOR-it dhe përfaqësuesve të Listës Serbe.
Lista Serbe nuk ka pranuar që të prononcohen për media, mirëpo shkurtimisht kanë thënë se do të shohin nëse do të përmbushen kërkesat e tyre.
Takimi mes këtyre dy palëve është mbajtur në një objekt afër komunës së Zveçanit.
Nga ana tjetër, presidenti i Serbisë, Aleksandar Vuçiq, ka njoftuar, sipas versionit të tij, presidentin turk Rexhep Tajip Erdogan për kronologjinë e ngjarjeve që çuan në përshkallëzimin e dhunës në veri të Kosovës.
Vuçiq përmes një bisede telefonike, ka kërkuar nga presidenti turk, që të shfrytëzojë reputacionin dhe ndikimin e vendit të tij për të siguruar paqe dhe stabilitet në rajon.
“Presidenti Erdogan u interesua për situatën aktuale në Kosovë dhe Metohi dhe presidenti Vuçiq e informoi për kronologjinë e ngjarjeve që çuan në përshkallëzimin e dhunës kundër komunitetit serb atje. Ai gjithashtu kërkoi nga kreu i shtetit turk që të përdorë reputacionin dhe ndikimin e vendit të tij për të ruajtur paqen dhe stabilitetin në rajon.” – njoftoi Zyra për Bashkëpunim me Media e Presidentit të Serbisë, transmetojne mediat serbe.
