Ministri i Mjedisit, Planifikimit Hapësinor dhe Infrastrukturës, Librun Aliu, sot ka dalë në terren për të përcjellë gjendjen pas shpërthimit të një gypi në lumin Lepenc në fshatin Biti e Poshtme të Shtërpcës.
Me anë të një postimi në Facebook, Aliu njoftoi se së bashku me Inspektorin e ministrisë vizituan vendin e ngjarjes ku është shpërthyer një gyp në lumin Lepenc nga Hidrocentrali Vinçës.
“Pas pranimit të informacionit prej banorëve të fshatit Biti e Poshtme, Komuna e Shtërpcës, rreth shpërthimit të një gypi në lumin Lepenc nga Hidrocentrali Vinçës, sot, së bashku me Inspektoriatin e Ministrisë, realizuam një vizitë në vendngjarje, për të inspektuar nga afër gjendjen e krijuar, në mënyrë që të bëjmë sa më parë sanimin e këtij problemi”, tha ai.
Ai ka thënë se në momentin e inspektimit nuk kishte rrjedhje të ujit nga gypi, për arsye se kishte rrjedhje normale të ujit të lumit Lepenc.
“Operatori është obliguar që në një afat samë të shpejtë kohor, të bëjë sanimin e gjendjes dhe të informojë Inspektoratin e MMPHI-së rreth rregullimit të gypit sipas të gjitha dispozitave ligjore në fuqi”, shtoi ai.
