Natën mes të shtunës dhe të dielës (26 mars), akrepat e orës do të lëvizin për një orë përpara, që do të thotë se ora 02:00, do të jetë ora 03:00.
Ideja kryesore e ndryshimit të orës është përdorimi më i mirë i dritës natyrale të ditës. Lëvizja e orës një orë përpara në pranverë do të thotë që do të kemi më shumë dritë të ditës.
Ora verore fillon të dielën e fundit të marsit dhe përfundon të dielën e fundit të tetorit.
Në Evropën Perëndimore, “lëvizja e orës” u krijua në fillim të viteve 1970, me shpjegimin se “zgjat” ditën, kursen energjinë, rrit produktivitetin, përmirëson përshtatjen e njerëzve dhe e bën ditën e punës më efikase.
Megjithatë, në kundërshtim me besimet e mëparshme, argumentet kundër një praktike të tillë citohen gjithnjë e më shumë, si për shembull fakti që ajo nuk rezulton në kursime të energjisë dhe prish modelet e vendosura të gjumit, të cilat, sipas shkencëtarëve, mund të kenë pasoja të rëndësishme.
Qyteti i parë që prezantoi praktikën e orës verore ishte Thunder Bay në Kanada në vitin 1908 për të ruajtur dritën e ditës në muajt e dimrit, ndërsa vendi i parë që prezantoi orën e verës ishte Gjermania më 1916.
