Trajneri i Arsenalit, Mikel Arteta, ka thënë se mesfushori Thomas Partey, nuk do të largohet këtë afat kalimtar veror, pavarësisht ardhjes së Declan Rice, me të cilin pak a shumë ndajnë të njëjtin pozicion në fushë.
Emri i ganezit është shfaqur rregullisht në rubrikat e thashethemeve që nga hapja e afatit kalimtar, pasi ai ka qenë i lidhur me Juventusin dhe besohet të jetë subjekt i një interesimi nga Lindja e Mesme, saktësisht Al Ahli. Bisedat për një largim janë bërë më të zhurmshme që kur topçinjtë e blenë 116 milionë euro Rice nga West Ham.
Megjithatë, trajneri kryesor i Arsenalit, Arteta thotë se Partey është i lumtur në veri të Londrës dhe beson se ai mund të luajë së bashku me mesfushorin anglez.
“Sa herë që kam folur me të dhe sa herë kam një bisedë me të, vullneti i tij është të qëndrojë me ne. Për mua nuk ka asgjë fare”, tha ai në një konferencë për shtyp.
I pyetur nëse Partey dhe Rice do të përshtateshin në të njëjtin ekip, ai shtoi: “Ata mund të luajnë së bashku dhe kjo është në planet e mia. Ju dëshironi të përmirësoni skuadrën dhe të keni më shumë cilësi. Ne kemi nevojë për lojtarë që mund të luajnë së bashku, por ne kemi nevojë për lojtarë në të njëjtin pozicion që mund të luftojnë për vendet e tyre. Është diçka që nuk e kemi pasur gjatë viteve të fundit dhe ne donim ta përmirësonim atë dhe kjo është arsyeja pse blemë Declan.”/PapirusSport
