Gjatë ditës së sotme, Policia e Kosovës ka arrestuar Millun Millenkoviq- Llunen, si i dyshuari kryesor për organizimin e protestave të fundit të dhunshme në veri të vendit.
Ministri i Brendshëm, Xhelal Sveçla, tha se Millenkoviqi, i njohur me nofkën “Llune”, është njëri nga udhëheqësit e formacionit kriminal “Mbrojtja Civile” dhe prijësi i bandave kriminale.
Ai shtoi se gjatë arrestimit të tij janë lënduar lehtë tre zyrtarë policorë.
“Siç edhe e kam theksuar në vazhdimësi, koha e bandave kriminale në veriun e vendit tonë ka përfunduar.
Të gjithë individët apo grupet kriminale që kanë cenuar sigurinë dhe rendin kushtetues të Republikës së Kosovës, do të përballen me drejtësinë”, tha Sveçla.
Agjencia e lajmeve AP ka publikuar pamje të ditës së sotme, ku shihet një veturë e dëmtuar e Policisë së Kosovës, ndërsa në të njëjtën kohë fluturojnë gurë të shumtë në drejtim të forcave policore në Mitrovicë të Veriut.
