Një efektiv ka mbetur i lënduar pas tensioneve në kampin e muxhahedinëve në Manëz të Durrësit. Nga pamjet që po transmetohen live në ABC News nga kampi, shihet punonjësi e policisë që futet brenda ambulancës për t’u dërguar më pas në spital pas lëndimeve që ka marrë si pasojë e gazit lotsjellës.
Zëdhënësi i MEK pretendon ka mbetur i vrarë një banor i Ashrafit. Sipas zëdhënësit të MEK kanë mbetur të plagosur dhe 36 persona të tjerë. Ende nuk ka asnjë informacion zyrtar apo konfirmim nga policia shqiptare. Mësohet se i vdekur ka mbetur banori i Ashrafit, i identifikuar si Ali Mostashari.
Kujtojmë se prej mëngjesit të sotëm policia ndodhet në ambjentet e kampit ku po ekzekuton vendimin e GJKKO.
________
Një nga banorët e kampit në një deklaratë për mediat shprehet se një nga ato është vrarë nga forcat e policisë shqiptare.
Ndër të tjera përfaqësuesi i kampit pretendon se policia shqiptare gjatë kontrollit të paparalajmëruar kanë përdorur gaz lot sjellës dhe dhunë ku si pasojë një prej tyre ka humbur jetën. Ndër të tjera ai thekson se në lidhje me këtë operacion ka edhe të lënduar dhe disa persona të arrestuar.
Ndër të tjera ai thekson se vrasja është bërë me gaz dhe me goditje nga ana e policisë.
“Policia shqiptare ka vrarë një nga vëllezërit tanë, ato kanë përdorur gaz lotsjellës ose goditje me armë. Ai ishte vrarë, po bëjnë një hedhje gazi dhe po godasin. Akoma është brenda dhe nuk na lejojnë që të bëjmë asnjë veprim, ne muxhahedinët nuk jemi kriminele por jemi opozitë. Në mëngjes pa asnjë paralajmërim janë futur brenda kampi tonë, çfarë kemi bërë ne që ato vijnë dhe futen pa lajmëruar. Disa nga ne janë lënduar dhe të tjerë vëllezër dhe motra janë arrestuar”, ka thënë një dëshmitar.
________
Policia e Shtetit mëngjesin e kësaj të marte me urdhër nga SPAK kanë zhvilluar kontrolle në brendësi të kampit Ashraf 3 në Manëz ku dyshohej për ngritjen e një qendre të paligjshme.
Gazetari Leonidha Musaj në një raportim për ABC News thekson se një nga pjesëmarrësit në operacionin e kësaj të marten në brendësi të kampit i ka pohuar se banorët i kanë pyetur policinë se pse ky kontroll, dhe kanë pohuar që në fillim se ato kanë një person të vdekur dhe duhet që ti bëjnë ritualet.
“Një burimi im i brendshëm që merrte pjesë në operacion, që në momentet e para që janë futur në ambientet e MEK, banorët i kishin pohuar policisë se pse ky insistim, se kanë një person të pajetë dhe do i kryenin ritet e zakonshme”, ka thënë gazetari.
Ndërkohë në një deklaratë për mediat zëdhënësi i MEK kishte deklaruar për mediat se gjatë tensioneve brenda kampit një person ishte vrarë nga policia shqiptare.
Gjithashtu ministria e Brendshme në një deklaratë për mediat ka konfirmuar tensionet që kanë ndodhur në kampin e MEK në Manëz të Durrësit, por që sipas tyre nuk ka pasur as viktima dhe as të lënduar
_________
Ndërkohë që në Shqipëri ka mbetur i vdekur një muxhahedin dhe disa të plagosur ndodhen në spitalin e muxhahedinëve, brenda kampit ASHRAF në Manëz të Durrësit, 20 qershori nuk është një ditë e rastësishme për ta.
Pasi si sot 42 vite më parë, MEK organizoi një demonstratë kundër Khomeinit me qëllim përmbysjen e regjimit. Rreth 50 protestues u vranë në protesta.
Më 28 qershor të po të njëjtin vit, selia e Partisë së Republikës Islamike u hodh në erë nga MEK, dhe më shumë se 70 anëtarë të udhëheqjes u vranë.
Duke u përballur me shtypjen e mëvonshme të MEK nga IRP, Rajavi iku në Paris. Ndërkohë, rrjeti nëntokësor që mbeti në Iran vazhdoi të planifikonte dhe të kryente sulme dhe supozohet se kreu bombardimin e gushtit 1981 që vrau presidentin dhe kryeministrin e Iranit, Rajai dhe Bahonar.
Protestat iraniane të 20 qershorit 1981, të njohura gjithashtu si protestat e 30 Kordadit, ishin njëditore kundër Republikës Islamike e organizuar nga Muxhahedinët e Popullit të Iranit më 20 qershor 1981 në qytete të ndryshme iraniane në përgjigje të fajësimit të presidentit të atëhershëm Abolhassan Banisadr.
Më 20 qershor 1981 u panë protesta në Teheran, Isfahan, Urmia, Shiraz, Arak, Ahvaz dhe Bandar Abbas. Protestat në Teheran u përqendruan në qendër të qytetit dhe rreth zonave të tilla si rruga Enghelab, sheshi Ferdoësi, sheshi Moniriyeh, rruga Taleghani dhe rruga Vali Asr.
