Pasi e “nokautoi” Serbinë në Kupën e Botës, tash kanë nisur raportimet se Granit Xhaka mund të dënohet nga FIFA për shkak të fanellës Jashari që e mbante të veshur pas fitores 2:3 teksa festonte me bashkëlojtarët.
Sipas raportimeve në mediat e huaja, Xhaka po hetohet për shkak se dyshohet se bluza kishte motive politike, anise vetë Xhaka e kishte mohuar një gjë të tillë, shkruan Demokracia.com.
E në rast se Granit Xhaka gjobitet nga institucioni më i lart i futbollit në botë, ish-presidenti i Kosovës dhe biznesmeni Behgjet Pacolli është shprehur i gatshëm të paguajë gjobën.
“Nëse emri Jashari shqetëson FIFA-n apo botën dhe Granit Xhaka dënohet se ka mbajtur pas ndeshjes këtë emër të shenjtë, atë gjobë do ta paguaj personalisht unë, në emër të popullit shqiptar. Këtë ia kam njoftuar sot personalisht edhe Granitit. Tani ecim tutje dhe u urojmë atyre fat të vazhdueshëm kundër Portugalisë”, ka shkruar Pacolli në llogarinë e tij në Facebook.
Granit Xhaka ishte titullar dhe luajti gjatë gjithë ndeshjes kundër Serbisë duke bërë një paraqitje fenomenale e cila në fund rezultoi me dërgimin e Serbisë në shtëpi.
