Prokurori i Posaçëm, Jack Smith ka dhënë dorëheqje nga Departamenti amerikan i Drejtësisë, pak ditë përpara se presidenti i zgjedhur Donald Trump të kthehet zyrtarisht në Shtëpinë e Bardhë.
Ky akt i Smith vjen pasi ai e dorëzoi raportin hetues ndaj Trump.
Dorëheqjen e konfirmoi Departamenti i Drejtësisë të shtunën mbrëma. Smith kishte dhënë dorëheqje të premten.
Smith heq dorë kështu pasi ndjekjet penale të tij kundër Trump përfunduan pa sukses dhe pushuan pasi republikani i fitoi zgjedhjet presidenciale në SHBA.
Trump paralajmëroi në dhjetor se ish-kryeprokurori i Zyrës së Prokurorit të Specializuar, Jack Smith do të kthehet në Gjykatën Speciale në Hagë.
Në një intervistë në NBC, ai ka folur specifikisht për Smith, i cili para një viti ishte emëruar për t’i mbikëqyrur hetimet penale ndaj Trump.
“Në historinë e vendit tonë, asgjë e tillë nuk ka ndodhur kurrë. Dhe unë i kam fituar këto raste. Unë i kam fituar të gjitha dhe pjesa tjetër janë në proces të fitimit. I çmenduri Jack Smith është duke u kthyer në Hagë ku mund të ekzekutojë njerëz. Këtu duhej të qëndronte. Unë… mendoj se ai është i rrezikshëm edhe atje”, ka thënë presidenti i zgjedhur amerikan.
I pyetur nëse do të donte hetimin e prokurorit Jack Smith, Donald Trump ka thënë: “Epo, unë mendoj se ai është shumë i korruptuar, por dua që ajo të bëjë çfarëdo që ajo”, duke iu referuar Pam Bond, gruas të cilën ai e ka nominuar për prokurore të përgjithshme.
Insistimit të gazetares se a do të ndikonte te Bond që Smith të ndiqej penalisht, Trump i është përgjigjur se nuk do t’i japë udhëzime.
“Ajo është një person shumë i zgjuar. Ajo është – Ajo ishte një prokurore e madhe e përgjithshme në Florida. Ajo është me shumë përvojë. Unë dua që ajo ta bëjë atë që dëshiron ta bëjë. Unë nuk do ta udhëzoj atë ta bëjë këtë, jo”.
Smith është prokurori që i akuzoi për krime lufte dhe krime kundër njerëzimit ish-krerët e Ushtrisë Çlirimtare të Kosovës. Ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi dhe ish-deputeti Rexhep Selimi po mbahen ende në paraburgimin e Gjykatës Speciale në saje të asaj aktakuze.
Në paraburgim në Hagë qëndrojnë edhe ish-komandantë e ish-ushtarë të UÇK-së për akuza të ngjashme. Disa tashmë janë dënuar.
