Presidentja e Kosovës, Vjosa Osmani ka takuar Zëvendëskëshilltarin për Siguri Kombëtare të Shteteve të Bashkuara, Jon Finer.
Në një pjesë të takimit, u diskutua edhe për zhvillimet e fundit në Kosovë, thuhet në njoftimin e Presidencës, shkruan Periskopi.
Presidentja Osmani tha se Kosova ka ndërmarrë hapa për të depërshkallëzimin e situatës në veri të Kosovës dhe është e përkushtuar të punojë me aleatët, në veçanti me SHBA, për të adresuar sfidat e sigurisë.
“Heqja e masave të BE-së ndaj Kosovës do ta mundësojë rifillimin konstruktiv të dialogut, teksa roli i SHBA-ve, është përcaktues në dialog”, ka theksuar Presidentja Osmani.
“Presidentja Osmani theksoi se pavarësisht zhvillimeve aktuale politike dhe të sigurisë në rajon, Kosova mbetet e përkushtuar për paqe, dialog dhe partneritet”, citon Presidenca Osmanin.
Kujtojmë se z.Jon Finer, e kishte telefonuar kryeministrin Albin Kurti para katër muajsh, kur situata në veri ishte përshkallëzuar.
“I kënaqur të flas me zëvendës këshilltarin e Shtëpisë së Bardhë për Sigurinë Kombëtare, Jon Finer. E falënderova për telefonatën e tij dhe u angazhova për të punuar me SHBA për të ulur tensionet. Kjo kërkon një fund të menjëhershëm të dhunës nga turmat e sponsorizuara nga Beogradi kundër oficerëve të sigurimit deri në zgjedhjet e reja në ato komuna” – pati njoftuar Kurti.
