Presidentja e Kosovës, Vjosa Osmani, tha se çështja e njohjeve të pavarësisë së Kosovës nuk duhet të shihet vetëm te numrat shtesë, por edhe te puna e Presidencës me shtetet të cilat Serbia i kishte prezantuar si çnjohje, transmeton Gazeta Papirus.
Osmani, tha në Rubikon të Klan Kosovës, se Presidenca në bashkëpunim me aleatët ka punuar në rikonfirmimin të njohjes nga këto shtete.
“Serbia pati prezantuar një listë prej mbi 25 shtetesh, të cilat sipas tyre kanë lëshuar letra se kanë tërhequr njohjet, apo kanë ngrirë procesin e njohjeve, etj. Dhe pastaj kjo reflektohet në praktikë, sepse ato shtete kur ndërmarrin një hap të tillë nuk votojnë pro teje si shtet në anëtarësime, pra ka efekt, ne mundemi me e injoru si proces megjithatë është efekt shumë negativ, ka pasur njerëz që kanë dashur me injoru, ne mund të ia bëjmë qejfin vetes të themi se nuk ekziston çnjohja si koncept”, tha Osmani në Rubikon të Klan Kosovës.
Osmani tha se vetëm nga një shtet, për të cilin Serbia kishte thënë se e ka tërhequr njohjen, nuk kanë marrë përgjigje deri tani, por nuk tregoi se për cilin shtet bëhet fjalë.
“Si presidencë jemi marrë shumë me këto 25 çnjohje të pretenduara nga ana e Serbisë përsëri me ndihmën e aleatëve kemi arritur të rikthejmë secilën, përveç njërës për të cilën akoma nuk kemi përgjigje as ne as aleatët tanë”, tha Osmani.
Presidentja shtoi se puna e institucioneve të Kosovës në këtë drejtim është një e arritur shumë e madhe.
“Kjo në aspektin total të njohjeve të Kosovës është një arritje e madhe, sepse s’mund të thuhet se s’ka pasur lëvizje në procesin e njohjeve kur në fakt në mbi 20 shtete i kemi rikthyer relacionet tona dhe kjo është shumë me rëndësi sepse Serbia e pati krijuar një përshtypje negative te shtetet që s’ka kanë njohur duke thënë mos u ngutni se këta të tjetër po tërhiqen”, tha Osmani në Rubikon të Klan Kosovës.
