Presidentja e Kosovës, Vjosa Osmani, ka bërë një postim në llogarinë e saj në Twitter duke falënderuar eurodeputetët që ishin zë i fuqishëm brenda BE-së për heqjen e vizave për Kosovën.
“Për të gjithë eurodeputetët aktualë dhe ish-deputetë që kanë qenë përkrahësit më të vendosur në arritjen e lirisë së vizave për Kosovën: Faleminderit! Faleminderit që jeni zëri i popullit të Kosovës në Parlamentin e BE-së”, ka shkruar Osmani, duke e përmendur Ulrike Lunacek, Tanja Fajon, Lukas Mandl, Viola VOn Cramon, Thijs Reuten, Ilhan Kyuchyuk.
Në Strasbourg, sot është nënshkruar zyrtarisht ligji i ri për liberalizimin e vizave për Kosovën, i cili dje u miratua nga Parlamenti Evropian.
Pjesë e kësaj ceremonie ishte kryetarja e Parlamentit Evropian, Roberta Metsola dhe ministrja suedeze e BE-së që përfaqëson presidencën e Këshillit të BE-së, Jessika Roswall, ndërsa nga Kosova zëvendëskryeministri, Besnik Bislimi.
Miratimi i vendimit për liberalizimin e vizave për qytetarët e Kosovës u bë pa votim, pasi nuk kishte asnjë kundërshtim.
20 ditë pas nënshkrimit, vendimi publikohet në gazetën zyrtare, për të hyrë në fuqi më 1 janar 2024, atëherë kur dhe funksionalizohet sistemi ETIAS.
Kryetarja e Parlamentit Evropian, Roberta Metsola, ka uruar qytetarët e Kosovës për liberalizimin e vizave.
Metsola e cila mori pjesë në nënshkrimin e aktit ligjor për liberalizimin e vizave, tha se është një moment krenarie që sot dhamë dritën e gjelbër përfundimtare në këtë proces.
“Nënshkruar, vulosur, dorëzuar. Moment krenarie për Parlamentin Evropian, pasi sot dhamë dritën jeshile përfundimtare për liberalizimin e vizave me Kosovën. Kjo do ta bëjë jetën më të lehtë për popullin e Kosovës – të udhëtojë, të bëjë biznes, të thellojë lidhjen me evropianët”, ka shkruar Metsola në Twitter.
