Presidentja e vendit, Vjosa Osmani, është shprehur mirënjohëse për mikpritjen e arbëresheve.
Osmani ka thënë se arbëreshët janë shtyllë e kulturës dhe e identitetit kombëtar.
“Për shekuj të tërë, ata e kanë ruajtur identitetin kombëtar e gjuhësor, traditën, ritet e kulturën e të parëve të tyre. Ideja e rilindjes kombëtare dhe historia e heroit tonë nacional, Gjergj Kastriotit, e gjejnë burimin në tokën e arbëreshëve”, ka shkruar Osmani në një postim në Facebook.
Presidentja ka falënderuar komunën e Frasnitës për çmimin “Gjergj Kastrioti”, ku ka thënë se ky çmim është mirënjohje për betejën historike të Kosovës për liri dhe për ruajtjen e identitetit kombëtar.
Ajo ka bërë të ditur se është inauguruar edhe sheshi në qytetin e Frasnitës, i cili mban emrin “Kosova”.
“Po ashtu, në zemër të Arbërisë, në praninë e shumë arbëreshëve të Frasnitës, inauguram sheshin, i cili e mban emrin e Republikës sonë, sheshi ‘Kosova’. Nga sot, kemi një copëz Kosove në zemër të Kalabrisë!”, ka shkruar tutje ajo.
