Yevgeny Prigozhin, një oligark i lidhur me Kremlinin, i njohur si “kuzhinieri i Vladimir Putinit”, duket se pranoi ndërhyrjen ruse në zgjedhjet amerikane.
Në përgjigje të pyetjes së një gazetari rreth ndërhyrjes së mundshme të Rusisë, në zgjedhjet e Kongresit amerikan të martën, Prigozhin, tha se Rusia ka ndërhyrë, po ndërhyn dhe do të vazhdojë të ndërhyjë në procesin demokratik të SHBA-së, transmeton KlanKosova.tv.
Prigozhin, nuk ka asnjë post në qeverinë ruse, por deklarata e tij ishte pranimi i parë i një fushate ruse të nivelit të lartë për të ndërhyrë në zgjedhjet amerikane nga dikush afër Kremlinit, raporton CNN.
Thuhet se Prigozhin është një nga të besuarit e Putinit – aq i afërt sa që shtypi rus e quajti atë “kuzhinier” të presidentit rus, pasi ai filloi të organizonte aktivitete për Kremlinin. Kremlini është akuzuar për ndërhyrje në zgjedhjet amerikane që nga viti 2016, por zyrtarët e qeverisë ruse, përfshirë Putinin, kanë mohuar vazhdimisht ndërhyrjen në politikën amerikane.
