“KRU Gjakova” ka njoftuar sot qytetarët e Rahovecit se do ketë ndërprerje të ujit dhe kjo periudhë do të zgjasë deri në stabilizimin e furnizimit.
Ndërkohë, një pakënaqësi e madhe është treguar nga qytetarët e Rahovecit të cilët e konsiderojnë jo normale reduktimin e ujit të pijshëm, veçanërisht në këto ditë të nxehta, shkruan Gazeta Papirus.
Lidhur me situatën, qytetari i Rahovecit, Enis Durguti tha për Gazeta Papirus se nuk ka ndonjë arsye se përse po ndodh kjo, për faktin se nuk kanë pasur asnjëherë probleme me ujin.
“Në kohën e vërshimeve rezervuaret kanë qenë të mbushura me ujë dhe nuk kemi pasur probleme, ndërsa sot ka ndërprerje të ujit në këto temperatura të larta, madje vetëm në Rahovec ndërsa në Gjakovë nuk ka”, tha Durguti.
Tutje u shpreh se, ndërprerja e ujit ka nisur qysh se tri ditë, megjithatë sot është lajmëruar nga kompania.
“Unë jetoj në pjesën poshtë këtu në Rahovec dhe kam probleme me ujin, imagjino ata që jetojnë në pjesën lart. Po mundemi po e ndalim, nuk ka ndonjë arsye tjetër”, tha ai.
/Gazeta Papirus/
