Kryetari i degës së Nismës Socialdemokrate në Gjakovë, Fazli Hoxha, ka deklaruar se partia e tij vazhdon të mbetet e përkushtuar ndaj shtetndërtimit dhe stabilitetit politik në Kosovë. Ai ka theksuar se Nisma është në favor të një qeverie të re, të drejtuar nga partitë opozitare, por pa shkaktuar një krizë institucionale që do ta çonte vendin në zgjedhje të reja.
Sipas Hoxhës, Kosova ka nevojë për një ndryshim në qeverisje, duke argumentuar se shumica shqiptare në vend aktualisht përfaqësohet nga opozita. Ai ka theksuar rëndësinë e ruajtjes së partneritetit me Aleancën për Ardhmërinë e Kosovës (AAK), duke e cilësuar atë si një aleat të rëndësishëm në Kuvendin e Kosovës.
“Vendi ka nevojë për një qeverisje të re dhe efektive, e cila do të reflektojë më mirë vullnetin e shumicës. Nisma Socialdemokrate mbështet ndryshimin, por nuk do të duhej të lejonte që vendi të shkojë sërish në zgjedhje të reja, nëse një gjë e tillë do të varej nga votat tona në Kuvend,” ka deklaruar ai.
Ai ka potencuar se në këtë situatë të ndjeshme politike, interesi madhor mbetet stabiliteti i Kosovës dhe zhvillimi i saj institucional.
POSTIMI I PLOTË
Nisma Socialdemokrate që nga themelimi i saj ka dhënë kontribut në shtetndërtimin e vendit. Edhe sot është për një qeveri e cila do të drejtohet nga partitë opozitare, duke e ruajtur partneritetin edhe me AAK-në – si një grup parlamentar.
Vendi ka nevojë për ndryshim të qeverisjes, e shumica shqiptare është nga opozita. Megjithatë mendoj se Nisma në asnjë mënyrë nuk do të duhej të lejonte që vendi të shkojë sërish në zgjedhje të reja parlamentare nëse kjo do të varej prej votave të saj në Kuvend. Interesi madhor në këtë kohë është vetëm Kosova.
