Një ngjarje makabre ka tronditur Brazilin dhe ka bërë bujë në mediet e gjithë globit. Babai 28-vjeçar ka vrarë katër fëmijët e tij duke i mbytur me jastëk dhe i vrarë me thikë për motivin më absurd në botë, si hakmarrje për ish-gruan dhe nënën e fëmijëve të tij.
Fëmijët e moshës 3, 6, 8 dhe 11 vjeç u gjetën të vdekur në shtëpinë e David da Silva Lemos në Alvorada në Brazilin jugor. Policia e arrestoi autorin dhe i mori edhe dëshminë, ku tha se i kishte dhënë çaj qetësues fëmijëve, përpara se t’i mbyste me jastëk dhe t’i godiste për vdekje me thikë.
Familjarët gjetën fëmijët të pajetë me plagë thike. Autori ka refuzuar të tregojë arsyen e këtij veprimi të rëndë, por gjyshja nga nëna e fëmijëve është shprehur se ai e ka bërë këtë për t’u hakmarrë ndaj ish-gruas, e cila ishte larguar së fundmi nga shtëpia, pas dhunës së ushtruar nga ai.
“Ai kishte sulmuar fizikisht vajzën time. Marrëdhënia e tyre mbaroi përgjithmonë, por ai e bëri këtë për të bërë të vuajë vajzën time, jam e sigurt për këtë. Zgjodhi ta bëjë në mënyrën më të keqe të mundshme. Ai është një frikacak”, tha ajo për mediat lokale.
