Nga Vlora në Prekaz, Kurti:28 Nëntori, datë themeltare e historisë

Kryeministri i vendit, Albin Kurti pasi është kthyer nga Shqipëria vizitoi Kompleksin Memorial në Prekaz, duke shtuar se 28 Nëntori është datë themeltare e histroisë së shqiptarëve kudo që janë.

“28 Nëntori ka nisur me Skënderbeun në Krujë, ka vazhduar me Ismail Qemalin në Vlorë, por së fundmi në luftën çlirimtare edhe me Adem Jasharin dhe Jasharët këtu në Prekaz, në këtë kryeqytet të kryengritjes shqiptare. 28 Nëntori është datë themeltare e historisë, e vetëdijes kolektive, e identitet kombëtar të shqiptarëve ngado që janë”, tha Kurti.

Përveç Jasharëve, Kurti foli edhe për daljen e parë publike të Ushtrisë Çlirimtare të Kosovës më 28 nëntor të vitit 1997.

“Me këtë rast dua t’i uroj gjithë shqiptarët kudo që janë për festën e pavarësisë së Shqipërisë, të flamurit kombëtar shqiptar duke përmendur përveç Prekazit, Vlorës edhe Krujës, gjithashtu edhe Llaushën, atëherë kur në vitin 1997 Rexhep Selimi, Mujë Kransiqi dhe Daut Haradinaj e shpallën botërisht Ushtrinë Çlirimtare të Kosovës e cila ishte bartëse e kryengritjes sonë dhe faktori kryesor që e bëri çlirimin e Kosovës në qershorin e vitit 1999 me ç’rast ne sivjet edhe festuam çerek shekulli nga çlirimi i atdheut tonë”, tha ai.