Të mërkurën në Zvicër, u takua me lider të shteteve të rajonit. Krejt këto takime, kryeministri Albin Kurti, i bëri në Forumin Ekonomik Botëror në Davos.
Por biseda të këtij niveli, Kurti nuk pati në Shtetet e Bashkuara të Amerikës. Ani pse qëndroi 18 ditë përtej Atlantikut, Kurti nuk shkeli në Shtëpinë e Bardhë.
Edhe me këshilltarin kryesor të presidentit Biden, Jake Sullivan, u takua jashtë saj.
Arsyeja e kësaj sipas profesorit i shkencave politike, Dritëro Arifi, mund të jetë një lloj mosmarrëveshje mes shefit të qeverisë e Departamentit Amerikan të Shtetit.
“Nëse nuk ka pas takim zyrtarë në State Departament, sidomos kishte me qenë i rëndësishëm me sekretarin Blinken, apo njërin nga ndihmësit e tij, po e ulim pak nivelin sepse po flasim për postin e kryeministrit, dhe mos përfshirja e ambasadës amerikanë në tërë vizitën e kryeministrit, atëherë kjo tregon që ka një keqkuptim apo një problem në komunikim”, ka vlerësuar Arifi.
Arifi po ashtu ka përmendur edhe disa çështje, që mund të lidhen më këtë.
“Mund të ketë qenë çështje që kanë mbetur pezull, siç është dialogu, vendimet e Gjykatës Kushtetuese, dhe ndonjë çështje tjetër…”, shtoi ai.
Por nga zyra e kryeministrit, në një përgjigje për Tëvë1, e kanë mohuar këtë.
“Ne kemi bashkëpunim konstruktiv dhe jemi në komunikim të rregullt dhe të vazhdueshëm me administratën e Presidentit Biden dhe përfaqësuesit e shtetit amerikan në Kosovë. ShBA-ja është aleati ynë strategjik dhe historik ndaj të cilit kemi dëshmuar partneritet të besueshëm dhe të qëndrueshëm, së fundmi në rastin e strehimit e rreth 1500 refugjatëve afganë dhe me rreshtimin me politikat e Shteteve të Bashkuara të Amerikës në raport me veprimet e Rusisë ndaj Ukrainës”, thuhet në përgjigjen e Zyrës së Kryeministrit.
Ndyshe, Kurti gjatë vizitës në SHBA, është takuar me këshilltarin e Departamentit të Shtetit, Derek Chollet. /Gazeta Papirus/
