Katër të arrestuarve për fajde ditën e djeshme, sot Gjykata e Ferizajt ua ka caktuar masën e paraburgimit prej 30 ditëve secilit. Tre nga ta janë të akuzuar për kryerjen e veprës penale për fajde. Për prezencën theksuar të kësaj dukurie ngrisin shqetësim nga Prokuroria e Shtetit, kurse ish-hetues policor flasin për arsyet që detyrojnë qytetarët të marrin para me fajde.
Nga 30 ditë paraburgim do t’i mbajnë katër personat e arrestuar dje të cilët dyshohet për fajde dhe organizim të bixhozit të paligjshëm.
Ata dolën të enjten para Gjykatës Themelore në Ferizaj, e cila ua caktoi këtë masë të sigurisë.
“Gjyqtari i procedurës paraprake i Departamentit për Krime të Rënda kërkesën e prokurorit të shtetit për caktimin e masës së paraburgimit kundër katër (4) të dyshuarve: B.M., A.H., B.K., A.M., e ka aprovuar si të bazuar dhe të njëjtëve i`u është caktuar masë e paraburgimit në kohëzgjatje prej një (1) muaji për secilin veç e veç, konform dispozitave ligjore të Kodit të Procedurës Penale të Republikës së Kosovës, për shkak të dyshimit të bazuar se të pandehurit kanë kryer veprat penale”, thuhet në përgjigjen nga Gjykata Themelore e Ferizajt.
Aksion kundër fajdes nuk ishte bërë vetëm të mërkurën.
Në mars të këtij viti po Prokuroria Themelore në Ferizaj kishte nisur aksionin “Brezovica” ku kishin mbetur të arrestuar 12 persona, të gjithë të dyshuar se janë marrë me fajde.
E, kjo dukuri është shqetësuese sipas prokurorit të këtij rasti, Rasim Maloku.
“Ka marrë një hov të jashtëzakonshëm, dhe po ashtu për shkak të kamatave të larta të bankave. Bëhet një qarkullim financiar paralel me sistemin bankar, aq shumë bëhet qarkullim të mjeteve monetare përmes fajdeve, është e pabesueshme për një qytetar që nuk merret me këtë çështje në mënyrë profesionale”, ka thënë Maloku.
Ndërsa, ish-hetuesi policor, Murat Mehmeti ka folur për aryset që i bëjnë qytetarët të pranojnë para me fajde.
“Gjendja e dobët ekonomike, moszhvillimi ekonomik, kamatat e larta në bankat komerciale të rregullta, administrata pak e tepruar, lypin garancione prandaj shpeshherë njerëzit që gjenden në situata të këqija ekonomike qoftë si biznes apo si person fizik detyrohet që t’i merr parat në rrugë”, ka thënë Mehmeti.
Policia e Kosovës ka njoftuar se gjatë aksionit të së mërkurës janë sekuestruar dy vetura, tri armë zjarri, 147 fishekë, gjashtë aparate të lojërave të fatit, një DVR me video incizime, pesëmbëdhjetë telefona dhe nëntë shtëpiza kompjuteri.
