Kryeministri i Izraelit Benjamin Netanyahu tha se çdo anëtar i Hamasit ishte “një njeri i vdekur” pas takimit të parë të qeverisë së jashtëzakonshme të vendit të tij. Krahas tij, opozitari Benny Gantz tha se tashmë ishte koha për luftë, shkruan BBC.
Por presidenti amerikan Joe Biden tha se kishte folur me Netanyahun dhe e bëri të qartë se Izraeli duhet të operojë sipas rregullave të luftës. Biden tha se e kuptonte zemërimin dhe zhgënjimin e popullit izraelit, por i kërkoi Izraelit t’u përmbahej parimeve të konventave të Gjenevës. Ai gjithashtu paralajmëroi Iranin, i cili e ka mirëpritur sulmin e Hamasit, të jetë i kujdesshëm.
Një ditë më parë, Netanyahu dhe Gantz ranë dakord të linin mënjanë një rivalitet të ashpër politik që ishte përshkallëzuar në protesta të gjera. Gantz u tha qytetarëve izraelitë se qeveria e sapoformuar ishte e bashkuar dhe e gatshme “për të fshirë këtë gjë të quajtur Hamas nga faqja e dheut”.
Udhëheqësi kryesor i opozitës në vend, Yair Lapid, ende nuk i është bashkuar aleancës. Megjithatë, Netanyahu dhe Gantz thanë në një deklaratë të përbashkët se një vend do t’i rezervohej atij në kabinetin e luftës.
“Gjatë periudhës së luftës, nuk do të promovohet asnjë projektligj apo vendim i qeverisë që nuk ka të bëjë me zhvillimin e luftës”, thuhet në një deklaratë.
Njoftimi i kabinetit të ri erdhi pas sulmeve të egra të militantëve të Hamasit nga Rripi i Gazës. Deri më tani, numri i të vdekurve në Izrael mësohet se ka arritur në 1200, ndërsa më shumë se 1100 njerëz janë vrarë nga sulmet ajrore izraelite në Gaza.
