Një vrasje që ndodhi në Thannhausen të Günzburgut në Gjermani, ka tronditur edhe opinionin kosovar.
Kjo pasi raportohet që Leonora Cena Nurkasa, u vra nga bashkëshorti i saj, 54-vjeçar.
Bekim Nurkasa dyshohet se e mbyti gruan e tij në shtëpi, mëngjesin e së mërkurës, derisa autoritetet gjermane tashmë e kanë vënë në pranga, njofton Klankosova.tv.
Si dorasi i dyshuar, ashtu edhe viktima, janë nga Rahoveci.
Sabahat Cena, nëna e Leonorës, në një postim në rrjetin social facebook, ka shprehur dhimbjen e saj për humbjen tragjike të së bijes.
“S’ka fjalë për ta përshkruar boshllëkun në zemrat tona… Zemrat tona janë thyer, shpirti ynë është plagosur, dhe çdo frymëmarrje duket më e rëndë pa praninë e saj. Dhimbja s’ka kufi…Ajo ishte dritë në jetën tonë, një shpirt i pastër, një buzëqeshje që ndriçonte edhe ditët më të errëta”, ka shkruar Cena, transmeton Klankosova.tv.
“Fati i pamëshirshëm na e mori shumë shpejt, në një mënyrën që nuk mund ta kuptojmë dhe nuk mund ta pranojmë. Uroj që kjo dhimbje të mos i ndodhë askujt. Pusho e qetë, o engjëlli ynë më i bukur, o shpirt i nonës…Gjithë familja është në vajtim…”, ka shkruar e ëma e Leonorës së vrarë.
