Në mungesë të kuorumit për votimin e rendit të ditës ka dështuar mbajtja e mbledhjes së Komisionit për Buxhet, Punë dhe Transfere.
Kjo ka shkaktuar pakënaqësi, tek deputeti Avdullah Hoti, i cili ka thënë se nuk ekziston konsultim për rendin e ditës.
“Unë i kam dërguar një e-mail me pikat e rendit të ditës që janë shumë të rëndësishme të patrajtuara nga sesioni pranveror. Ka pasur një traditë të dakordimit më herët, ju nuk po e përfillni. Unë s’mund ta votoj kështu rendin e ditës pa asnjë konsultim dhe pa pasur prioritete të çështjeve që kanë me u trajtu në komision”, ka thënë Hoti.
Kryetari Komisionit, Armend Muja tha se kur pikat mblidhen ne mungesë të kuorumit duhet të jenë në rend dite në ndonjërën nga mbledhjet.
Në rend dite ka qenë edhe vazhdim-Shqyrtimi i Raportit vjetor Financiar i Radio Televizionit të Kosovës për vitin 2022 si dhe shqyrtimi i Raportit të Shpenzimeve të Radiotelevizionit të Kosovës për periudhën prill – qershor 2023, Muaj tha se për këto pika ka interes dhe do të mund të zgjas mbledhja.
Ai tha se mbledhja e Komisionit do të mund të mbahet të premten ose mbledhjen e radhës.
