Kryeministri Edi Rama zhvilloi sot një takim secilin nga drejtuesit politikë të qarqeve për PS-në.
Secili prej drejtuesve të qarqeve jep propozimet për emrat që konsiderojnë si përfaqësues më të mirë të qarkut të tyre. Më pas emrat do të shqyrtohen në kryesinë e PS-së që do të mblidhet më 12 mars, ndërsa firmën finale e ka vetë Rama i cili vendos se kush do të jetë në listat e mbyllura e kush në listat e hapura.
Deri tani Rama është takuar me Blendi Klosi, drejtuesi politik i qarkut të Dibrës, Mirela Kumbaro, drejtuesja politike e qarkut të Gjirokastrës, Ulsi Manja drejtues politik i qarkut të Lezhës, Emirjana Sako, drejtuese politike e qarkut të Durrësit, Benet Beci, drejtuesi politik i qarkut të Shkodrës, Bledi Çuçi, drejtues politik i qarkut të Vlorës dhe Niko Peleshi, drejtues politik i qarkut të Korçës.
Pasdite do të vijojë takimet me Belinda Ballukun drejtuese politike e qarkut të Fierit, Eduard Shalsin, drejtues politik të qarkut të Kukësit, Ogerta Manastirliun dhe Elisa Spiropalin drejtuese të qarkut në Tiranë, Ervin Demo, drejtues politik i qarkut të Beratit, Arbjan Mazniku, drejtues politik i qarkut të Elbasanit.
