Skroma e Vushtrrisë bëhet vend-xhirim i epizodit të parë të serialit “Edhe malet flasin”
Fshati Skromë në Vushtrri është bërë vendi kryesor i xhirimeve për episodin e parë të serialit të ri “Edhe male flasin”, një prodhim që përqendrohet në vuajtjet e shqiptarëve gjatë viteve 1920-1930. Ky serial dramatik trajton periudhën e rëndë të shtypjes dhe qëndresës së shqiptarëve, duke sjellë në ekran një histori të ndjerë e plot emocione.
Në këtë projekt të ri, rikthehen aktorët e njohur të serialit të suksesshëm “Dashni dhe Pabesi”, të cilët kanë fituar zemrat e publikut me interpretimet e tyre të fuqishme. Xhirimet në fshatin Skromë sjellin një atmosferë autentike, duke i shtuar ngjyrën reale dramës historike që prek momente kyçe nga historia e shqiptarëve.
“Edhe male flasin” premton të jetë një projekt artistik me peshë të madhe, që përmes rrëfimeve personale të personazheve, shfaq vuajtjet, sfidat dhe heroizmin e një periudhe të errët për popullin shqiptar.
Me një kastë të përzgjedhur aktorësh dhe një ekip profesionistësh prapa kamerës, seriali pritet të tërheqë një audiencë të gjerë, duke rikthyer emocionet e “Dashni dhe Pabesi” dhe duke sjellë një histori të re, të fuqishme në ekranet tona./Gazeta Papirus/
