Goli i Rrahmanit mbajti gjallë shpresat e Ballkanit për titull. Kampioni në fuqi barazoi në sekondat e fundit kundër Prishtinës, para ndeshjes me Dritën të dielën.
Drita – Ballkani, është përballja më e fortë e këtij stinori, pasi aty mund të vendoset titulli, kur kanë mbetur vetëm edhe katër gjiro deri në fund. Tre pikë është dallimi mes tyre, ekipi nga Gjilani 66 pikë, kurse ai nga Suhareka 63 sosh. Nëse në fund të kampionatit skuadrat kanë pikë të barabarta, atëherë kampioni vendoset në bazë të përballjeve direkte.
Sivjet, Ballkani nuk ka fituar ndaj intelektualëve. Drita ka një fitore dhe janë arritur dy barazime. Derbi i vitit do të transmetohet në Sport 1 në Artmotion dhe në Klan Kosova të dielën nga ora 15:00.
Po të dielën në të njëjtin termin, Prishtina e pret Gjilanin ndërsa Llapi – Ferizajn.
Të shtunën, zhvillohen dy ndeshje tjera: Dukagjini – Malisheva dhe Trepça ’89 – Drenica.
