NATO-ja zyrtarisht ua ka ndaluar punëtorëve shkarkimin e aplikacionit TikTok në pajisjet e ofruara nga aleanca për shkak të shqetësimit për sigurinë, sipas dy zyrtarëve të NATO-s.
Zyrtarët e aleancës i dërguan një shkresë stafit të premten në mëngjes për ta njoftuar për këtë vendim, thanë zyrtarët. Me shkresë u bë zyrtar ndalimi i aplikacionit të famshëm, edhe pse ai nuk ishte në të vërtetë i përdorshëm as më parë në pajisjet e dhuruara nga NATO-ja për shkak të kufizimeve të brendshme në fushën e teknologjisë, thanë zyrtarët.
“Siguria kibernetike është prioritet i lartë për NATO-n. NATO-ja ka kërkesa të fuqishme për përcaktimin e aplikacioneve për përdorim zyrtar në punë. TikTok-u nuk është i qasshëm në pajisjet e NATO-s”- i tha televizionit CNN një zyrtar i lartë i aleancës.
NATO-ja është organizata më e lartë qeveritare që e ndalon përdorimin e këtij aplikacioni për shkak të shqetësimit se qeveria kineze mund të ketë qasje në të dhënat e përdoruesve të tij përmes kompanisë kineze që e ka në pronësi aplikacionin, “Bytedance”. ShBA-ja, Britania e Madhe, Norvegjia, Parlamenti Evropian dhe disa vende të tjera tashmë e kanë ndaluar këtë aplikacion në pajisje të lëshura nga qeveritë.
Shefi ekzekutiv i TikTok-ut, Shou Chew, tha para ligjvënësve amerikanë këtë muaj se kompania është tërësisht e pavarur nga Pekini dhe se ai “nuk ka parë dëshmi që qeveria kineze ka qasje në ato të dhëna”. “Ata kurrë nuk na i kanë kërkuar, ne nuk ua kemi ofruar”- tha ai.
Chew shtoi se TikTok-u është duke i vendosur të dhënat në ShBA, ku do të ruhen nga kompania amerikane, “Oracle”.
“Prandaj rreziku do të ishte i ngjashëm me çfarëdo qeverie që shkon te një kompani amerikane për të kërkuar të dhëna”- tha ai.
Prapëseprapë, qeveritë perëndimore janë skeptike. Sekretari i Shtetit i ShBA-së, Antony Blinken, tha këtë muaj në Kongres se TikTok-ut duhet t’i jepet fund “në një mënyrë ose në një tjetër”.
