Nënkryetari i Prishtinës, Alban Zogaj, ka kritikuar kryeministrin Albin Kurti për mungesë bashkëpunimi me nivelin lokal.
Zogaj ka thënë se ka gjashtë muaj që po presin takim me kryeministrin, por i njëjti nuk u është përgjigjur ftesave të tyre.
“Ne kemi pesë apo gjashtë muaj që presim të takohemi me kryeministrin, i kemi dërguar edhe ftesë zyrtare për t’i diskutuar problemet e përbashkëta sepse po flasim për kryeqytetin sepse kryeqyteti është përtej një komune sepse i takon edhe vet qeverisë”, ka deklaruar Zogaj në T7.
Ai po e konsideron problematike çështjen e bartjes së të hyrave vetanake të komunave.
“Nuk ka përplasje të mëdha por ka barriera dhe kjo çështja e bartjes së të hyrave vetanake neve si kryeqytet na ka shqetësuar, sepse kur flasim për bartjen e të hyrave flasim kryesisht për kryeqytetin ngase 35 milionë, 28 milionë janë të komunës së Prishtinës dhe kjo neve na atakon shumë”, ka shtuar nënkryetari i Prishtinës.
Sipas Zogajt, kjo çka po ndodh me të hyrat vetanake është absurde.
“Kjo çka po ndodh është antikushtetuese, për këtë ka pasur edhe një debat në Kuvendin e Kosovës ku u konstatu se një veprim i tillë është antikushtetues dhe që qeveria nuk mund t’i marr ato fonde”, tha Zogaj.
