Ministrja e Jashtme gjermane, Annalena Baerbock i ka bërë thirrje Kosovës dhe Serbisë që të ulin tensionet e fundit në zonën kufitare mes dy vendeve.
Dy vendet duhet “të bëjnë menjëherë gjithçka që munden për të qetësuar këtë situatë të pasigurt”, tha Baerbock në Berlin të premten përpara një takimi me homologun e saj nga Bosnje-Hercegovina, Elmedin Konakoviq. Si “një nga hapat e parë”, Baerbock i bëri thirrje Serbisë që “pa kushte” të lirojë tre policët kosovarë të kidnapuar nga autoritetet serbe, raporton “Täglichen Anzeiger”.
Përpara bisedimeve të saj me Konakoviqin, Baerbock ripohoi gatishmërinë e Gjermanisë për të mbështetur pranimin e Bosnje-Hercegovinës dhe katër shteteve tjera kandidate të Ballkanit Perëndimor në BE, transmeton KLankosova.tv.
ADVERTISING
Rruga drejt këtij qëllimi është një “prioritet absolut” për Gjermaninë. “Ne ju duam në BE dhe ne po ecim këtë rrugë së bashku me ju. Ne qëndrojmë në krahun tuaj dhe ju mbështesim me të gjitha forcat tona”, tha Baerbock duke iu referuar vendeve të BP-së.
Në lidhje me situatën në Bosnje-Hercegovinë, Baerbock tha se Gjermania “do të mbështesë vetëm ata që janë të përkushtuar për forcimin e vendit”. Duke përmendur Republikën Sërpska, Baerbock foli për “retorikë përçarëse” dhe për forcat që punojnë për të “përçarë dhe dobësuar” Bosnje-Hercegovinën.
