Ministri i ri i Mbrojtjes, Ejup Maqedonci, është shprehur i nderuar për marrjen e përgjegjësisë se re për të drejtuar Ministrinë e Mbrojtjes.
Ai ka falënderuar kryeministrin Albin Kurti për besimin dhe mbështetjen e deritanishme që i ka dhënë.
Në profilin e tij në “Facebook”, Maqedonci ka shkruar se ndihet i privilegjuar të vihem në krye të dikasterit qeveritar që do t`i bëj politikat e mbrojtjes dhe të zhvillimit të Forcës së Sigurisë së Kosovës, e cila është trashëgimtare e Ushtrisë Çlirimtare të Kosovës.
“Pasi e ka liruar nga detyra ministrin e deritanishëm Armend Mehajn, në një takim të përbashkët edhe me Komandantin e FSK-së Gjenerallejtënant Bashkim Jasharin, Kryeministri Albin Kurti më ka ngarkuar mua me detyrën e Ministrit në Ministrinë e Mbrojtjes të Kosovës. Me këtë rast, dua ta falënderoj Kryeministrin Kurti për besimin dhe mbështetjen e deritanishme dhe të mëtutjeshme ndaj meje! Jam i nderuar dhe i privilegjuar të vihem në krye të dikasterit qeveritar që i bën politikat e mbrojtjes dhe të zhvillimit të Forcës së Sigurisë së Kosovës, trashëgimtares së Ushtrisë Çlirimtare të Kosovës. Që nga 18 marsi i vitit 1998 kur e kam veshur uniformën e UÇK-së dhe deri më 10 korrik 2023 kur jam demobilizuar nga FSK-ja, jam përpjekur me tërë kapacitetet dhe qenien time fillimisht për lirinë e Kosovës dhe deri sot për ndërtimin e ushtrisë së saj”, ka shkruar ai.
